ഇരുവീടുകള്‍ക്കിടയില്‍ നട്ട മരങ്ങള്‍...
വീടുകള്‍ക്കിടയിലെ അതിരില്‍,
മതിലുവേണ്ട മരങ്ങള്‍ നടാമെന്ന് പറഞ്ഞത് അയല്‍ക്കാരനായ,
പോത്ത്നോട്ടക്കാരനാണ്.
അങ്ങനെ ഞങ്ങള്‍ക്കിടയില്‍,
മൂവാണ്ടന്‍മാവും,കിളിഞാവലും,ചാമ്പമരവും ഉണ്ടായി.
ഒരിക്കല്‍,എന്‍റെ കുളിമുറിയുടെ കിളിവാതിലിലൂടെ,
കായ്ച്ച് കിടന്ന ചെമ്പന്‍ ചാമ്പക്കായ്കള്‍ക്കിടയിലൂടെ,
അല്‍ഷിമേഴ്സ് ബാധിച്ച അമ്മയോട് അയാള്‍ പറയുന്നു,
“കുളിപ്പിച്ച് സുന്ദരിയാക്കിട്ടോ,,,ഇനി ഇതങ്ങ്
കഴിച്ചേ,എന്നിട്ട് വേണം
എനിക്ക് പോയി പോത്ത്കള്‍ക്ക് വെള്ളം കൊടുത്ത് വേഗം വരാന്‍…”
അങ്ങനെയാണ് ഷുന്‍റു സുസുകിയുടെ,
“സെന്‍ മൈന്‍ഡ്,ബിഗിനേഴ്സ്മൈന്‍ഡ്“-ന്‍
തുടര്‍ വായന നിലച്ച് പോകുന്നത്,,,
